ఏపీ టెక్స్‌టైల్ రంగంలోకి 9 కంపెనీలు.. విశాఖ సదస్సులో ఎంవోయూలు

ఆంధ్రప్రదేశ్ రాష్ట్రంలో జౌళి రంగంలో పెట్టుబడులు పెట్టేందుకు 9 కంపెనీలు ముందుకొచ్చాయని రాష్ట్ర చేనేత, జౌళి శాఖ మంత్రి ఎస్. సవిత తెలిపారు. విశాఖపట్నంలో ఈ నెల 14, 15 తేదీల్లో జరగనున్న పార్టనర్‌షిప్ సదస్సులో ఈ కంపెనీలతో రాష్ట్ర ప్రభుత్వం అవగాహన ఒప్పందాలు (ఎంవోయూలు) కుదుర్చుకోనున్నట్లు ఆమె స్పష్టం చేశారు. నిన్న రాష్ట్ర సచివాలయంలోని తన ఛాంబర్‌లో ఆయా కంపెనీల ప్రతినిధులతో మంత్రి సమావేశమయ్యారు.

ఈ సమావేశంలో కొందరు ప్రతినిధులు నేరుగా పాల్గొనగా, మరో ఐదుగురు వీడియో కాన్ఫరెన్స్ ద్వారా హాజరయ్యారు. మ్యాట్రెస్ మాన్యుఫ్యాక్చరింగ్, అపెరల్ ప్రొడక్షన్, గార్మెంట్స్ తయారీ, పాలిస్టర్ వేడింగ్ వంటి యూనిట్ల ఏర్పాటుకు ఈ సంస్థలు ఆసక్తి చూపినట్లు మంత్రి సవిత ఒక ప్రకటనలో తెలిపారు. ముఖ్యంగా, ఈ కంపెనీలు తమ పరిశ్రమలను రాయలసీమ ప్రాంతంలో స్థాపించడానికి సుముఖత వ్యక్తం చేశాయని ఆమె పేర్కొన్నారు. ఏయే ప్రాంతాల్లో పరిశ్రమలు ఏర్పాటు చేయాలనే అంశంపై విశాఖ సదస్సులో తుది నిర్ణయం తీసుకోనున్నట్లు వివరించారు.

ముఖ్యమంత్రి చంద్రబాబు నాయుడు నేతృత్వంలోని ప్రభుత్వం తీసుకొచ్చిన నూతన టెక్స్‌టైల్ పాలసీకి పారిశ్రామికవేత్తల నుంచి మంచి స్పందన వస్తోందని మంత్రి సవిత అన్నారు. ఈ పాలసీ వల్లే పలువురు పారిశ్రామికవేత్తలు ఏపీలో పెట్టుబడులు పెట్టేందుకు ఆసక్తి చూపుతున్నారని తెలిపారు. రాబోయే కాలంలో మరిన్ని కంపెనీలు రాష్ట్రంలో తమ యూనిట్లను ఏర్పాటు చేసేందుకు ముందుకొస్తాయని ఆమె ఆశాభావం వ్యక్తం చేశారు.

సమావేశానికి హాజరైన నలుగురు పెట్టుబడిదారులను మంత్రి సవిత ఈ సందర్భంగా సత్కరించారు. ఈ కార్యక్రమంలో రాష్ట్ర చేనేత, జౌళి శాఖ ముఖ్య కార్యదర్శి ఆర్.పి. సిసోడియా, కమిషనర్ రేఖారాణి తదితరులు పాల్గొన్నారు.